"Sa sinugdan, adunay pagboto—ug pagkahuman, ang pagpanglimbong." Kini nga libro dili balaan, ug labaw sa tanan, dili langitnon. Usa kini ka sinulat nga puno sa satira, hinugpong sa kasagmuyo, ug gisugyot sa mga demonyo sa kagamhanan nga adlaw-adlaw nagpa-antus sa ordinaryong katawhan. Wala kini nagtanyag og kaluwasan, kundili pagbutyag; dili pagtubos, kundili pag-ilaila sa mga peste nga nagsul-ob og barong, nakiglamano sa mga obispo, nagngisi-ngisi atubangan sa kamera, ug ginakaon ang damgo sa nasud sa matag pirma sa pagpanglimbong.
"Ang Bibliya sa Kurakot nga Politiko" usa ka literatura sa eksorsismo—usa ka pagpakaulaw sa mga balaan kuno nga teksto nga gipangyawit sa mga dili angay, ug usa ka samin nga gipaatubang sa mga namaligya sa ilang kalag alang sa pork barrel ug mga proyektong multo. Usa kini ka binastos nga ebanghelyo alang sa usa ka guba nga sistema, gisulat dili aron pasidunggan, kondili aron ipadayag.
Dinhi, ipadayag kung giunsa ang tabang nga daw gikan sa langit apan gibaligya bugti ang boto; kung giunsa ang mga kalsada nga gitabonan, dili tungod sa tinuod nga serbisyo publiko, kundi tungod sa suhol ug bakak; kung giunsa ang kabus nga wala gipatindog, kundi gitugutan nga magpabiling nagluhod aron tamakan sa mga makagagahum.
Matag kapitulo niini, naghulagway sa mga taktika, estratehiya, ug liko nga mga panghunahuna nga gigamit sa mga elitista aron ipangatarungan ang ilang kalibog. Imong masabtan kung giunsa nila pagtukod og imperyo gikan sa kasakit sa uban, kung giunsa nila gihimong legal ang pagpangawat pinaagi sa mga balaod ug regulasyon, ug kung giunsa nila gipangpahilom ang mga kritiko gamit ang donasyon ug pagpanglimbong. Gikan sa mga tago-tagong kompanya ngadto sa mga peke ug kurakot nga mga proyekto sa imprastruktura, walay balaan para kanila gawas sa ilang kaugalingong kaayohan.
Ug bisan pa niana—ang katuyoan niini nga satira dili lamang pagpakaulaw. Gitinguha niini nga pukawon ang hunahuna. Hagiton ang mga mambabasa, labi na ang kabatan-onan, sa pagpangutana, pagsulti, ug pagbuhat. Kini usa ka hinagiban sa kaalam, gipatuyok ngadto sa kasingkasing sa korapsyon, gipabuto uban ang paglaum nga mabungkag ang kahilom nga gitukod sa kahadlok.
Basaha kini. Hilak kung kinahanglan. Katawa kung gusto nimo. Apan labaw sa tanan, tugoti nga kining dili balaan nga kasulatan magdala kanimo, dili sa kawalay pakabana, kundi sa kamatuoran.
Kay sa satira, anaa ang kamatuoran.
Ug sa kamatuoran, anaa ang paglaum.
